Job 18

Impendulo KaBhilidadi

1Kwathi lapho uBhilidadi umShuhi waphendula wathi:

2“Koze kube nini ulokhu uphethe emlonyeni?
Nakana andubana sikhulume.
3Kungani usithatha njengezinkomo
kube ingathi siyizithutha kuwe na?
4Wena ozidabudabulayo ube yiziqa ngokuthukuthela kwakho,
uthi sesingawudela umhlaba ngenxa yakho?
Loba uthi amadwala agudlulwe ezindaweni zawo na?

5Isibane somubi siyacima;
ilangabi lomlilo wakhe liyaphela ukubhebha.
6Ukukhanya ethenteni lakhe kuyafiphala;
isibane esiseceleni kwakhe siyacima.
7Izisinde zakhe zamandla ziyadeda;
lamacebo akhe yiwo amlahla phansi.
8Inyawo zakhe zimbeka emambuleni
acine esemthandele.
9Umjibila umhwiphula ngesithende;
isihitshela simuthi nki.
10Isihitshela usifihlelwe phansi;
umjibila uthukuziwe endleleni yakhe.
11Uyethuka ngokwesaba inxa zonke
kumlandelele langaphi aya khona.
12Umonakalo umlambele;
incithakalo imlindele nxa esiwa.
13Kudla ingxenye yesikhumba sakhe;
izibulo lokufa lidla izitho zakhe.
14Uyasuswa ekuvikelekeni kwethente lakhe
aqhutshwe asiwe enkosini yokwesaba.
15Umlilo uhlala ethenteni lakhe;
isolufa evuthayo ichithachithwe emzini wakhe.
16Impande zakhe ziyabuna ngaphansi
lamagatsha akhe abune ngaphezulu.
17Ukukhunjulwa kwakhe kuyaphela emhlabeni;
kalabizo elizweni.
18Uyasuswa ekukhanyeni aye ebumnyameni
njalo axotshwe emhlabeni.
19Kalabantwana loba isizukulwane ebantwini bakibo,
kakho loyedwa owakhe lapho ake ahlala khona.
20Abantu bentshonalanga bayanengwa yisiphetho sakhe;
abantu bempumalanga bayatshaqeka.
21Ngempela linjalo ikhaya lomuntu omubi;
yiyo indawo yalowo ongamaziyo uNkulunkulu.”